केवळ एका बातमीच्या आधारे हा चर्चाप्रस्ताव मांडतो आहे: दिवेआगरमध्ये आता चांदीचा गणपती? या बातमीत असे नमूद केलेले आहे की "घोडके सराफ यांच्यातर्फे मूळ मूर्तीची चांदीची प्रतिकृती दिवेआगर देवस्थानला दिली जाणार आहे. ... मूळ मूर्ती १८ इंची होती, तर ही मूर्ती ११ इंचांची आहे. मात्र, त्याचे वजन पूर्वीच्या मूर्तीएवढेच १३२० ग्रॅम आहे."
(अवांतरः ग्रामस्थांनी मूर्ती स्वीकारण्यास नकार दिला अशीही बातमी प्रसिद्ध झाली आहे.)

काही तथ्थ्ये

मूळ मूर्तीच्या तुलनेत नव्या मूर्तीची उंची १८:११ प्रमाणात आहे आणि ती 'प्रतिकृती' आहे, त्यामुळे त्यांची आकारमाने ५८३२:१३३१ = ४.३८ प्रमाणात असावीत. नव्या मूर्तीची घनता १०.५ आहे परंतु वस्तुमान जुन्या मूर्तीप्रमाणेच १३२० ग्रॅम आहे. त्यामुळे, जुन्या मूर्तीची सापेक्ष घनता २.४ होती असे दिसते.

मूर्तीचा आकार समद्विभुज त्रिकोण मानू. उंची १८ इंच असेल तर, गूगलल्यावर सापडलेल्या छायाचित्रांनुसार मूर्तीची सरासरी रुंदी १० इंच असावी असे वाटते. त्यामुळे, द्विमिती प्रतिमेचे क्षेत्रफळ ११६० चौ. सें.मी. होते. १३२० ग्रॅम सोन्याचे आकारमान ६८. ४ घ. सें.मी. असते. त्यामुळे, मूळ प्रतिमा/मुखवटा शुद्ध सोन्याचा होता असे गृहीत धरले तर त्याची जाडी केवळ अर्धा मि.मी. होती असा निष्कर्ष निघतो आहे.

माझ्या आकडेमोडींमध्ये काही गफलती आहेत काय?

किंमत ठरविणे इ. अभ्यासासाठी, १५ वर्षांपूर्वी ती मूर्ती सापडली तेव्हापासून कधीही, ती मूर्ती तज्ञांकडे देण्यातच आली नाही असे सोन्याचा गणपती, .. बेगडी संस्कृती! या लेखात नमूद करण्यात आलेले आहे.

ती मूर्ती पोकळ होती काय? की लाकडी मुखवट्यावर दोहों बाजूंनी सोन्याचा पत्रा चढवून बनविण्यात आलेली असावी? गूगलल्यावर अशी माहिती सापडली की मूळ मूर्ती हा एक मूर्तीसारखा मुखवटा होता, म्हणजे तो किमान, मागून तरी खोलगट असावा. तसे असल्यास, तितक्याच किमतीत सोन्याचीही तशीच पोकळ मूर्ती/प्रतिमा बनविण्याचा प्रयत्न घोडके यांनी का केला नसावा? छायाचित्रे घेण्याची तेथे अधिकृत अनुमती नव्हती असेही वाचनात आहे.

या संदर्भात उपलब्ध माहिती, सुचणार्‍या आकडेमोडी, शक्यता व्यक्त कराव्या ही सर्वांना विनंती.